Lög Súlur, björgunarsveitin á Akureyri

Lög Súlna, björgunarsveitarinnar á Akureyri

 

1. grein.

Félagið heitir Súlur, björgunarsveitin á Akureyri. Lögheimili þess og varnarþing er á Akureyri. Félagið tekur við starfsemi Hjálparsveitar skáta Akureyri, Flugbjörgunarsveitarinnar á Akureyri og sjóbjörgunarsveitarinnar Súlna S.V.F.Í. Akureyri, skv. sérstökum samningi milli framangreindra aðila þar um.

2. grein.

Tilgangur félagsins er að starfrækja björgunarsveit í samræmi við ákvæði laga nr. 43/2003 um björgunarsveitir og björgunarmenn með síðari breytingum. Einnig að vinna almennt að björgunar- og hjálparstörfum ásamt því að sinna slysavörnum og fræðslu um öryggis- og björgunarmál.

Félagið aflar tekna með fjáröflunum af ýmsu tagi ásamt því að þiggja gjafir frá almenningi og lögaðilum sem vilja styðja við starfsemi félagsins.

Félagið ráðstafar fjármunum sínum til þess að kaupa tæki og búnað, standa fyrir fræðslu og styðja við félagsmenn svo þeir geti eftir fremsta megni tekið þátt í þeim verkefnum sem félagið sinnir.

Félagið er bundið af ákvæðum laga nr. 110/2025 um félög til almannaheilla, með síðari breytingum og öðrum ákvæðum sem gilda um félög sem skráð eru í almannaheillafélagaskrá

3. grein.

Einkenni félagsins er nafnið og fjallið Súlur. Stjórn setur nánari reglur um notkun og útfærslu.

4. grein.

Félagið er aðili að Slysavarnafélaginu Landsbjörg og í störfum fyrir félagið teljast félagsmenn bundnir af samþykktum sem gerðar eru á vettvangi Slysavarnafélagsins Landsbjargar.

Félagið er einnig bundið af ýmsum lögum og reglugerðum sem gilda um starfsemi björgunarsveita og önnur þau verkefni sem félagið sinnir.

5. grein.

Félagar geta allir orðið sem starfa vilja að þeim málum sem félagið lætur sig varða. Umsókn um félagsaðild skal berast skriflega til stjórnar og telst félagsaðild frá þeim degi er stjórn hefur fjallað um umsókn og fært til bókar.

Stjórn félags skal halda skrá yfir félagsmenn. Þar skal skrá fullt nafn, heimilisfang og kennitölu félagsmanna.

Ef félagsmaður óskar þess að hætta í félaginu, skal hann upplýsa stjórn um það skriflega og telst laus undan félagsaðild þegar stjórn hefur móttekið erindið.

6. grein.

Félagsmenn bera hvorki persónulega ábyrgð á skuldbindingum félagsins né eiga þeir tilkall til hlutdeildar í eignum eða afkomu þess.

7. grein

Stjórn getur vísað félagsmanni úr félaginu ef hann verður uppvís um eitthvað af eftirfarandi:

a) Með orðum sínum eða athöfnum kastað rýrð á orðspor félagsins.

b) Verið undir áhrifum áfengis eða lyfja í starfi fyrir félagið.

c) Valdið spjöllum á eignum félagsins.

d) Unnið gegn hagsmunum félagsins.

e) Gerst brotlegur við lög félagsins eða reglur.

f) Gerst brotlegur við siðareglur Slysavarnafélagsins Landsbjargar

Áður en félagsmanni verður vikið úr félaginu skal að jafnaði gefa viðkomandi færi á að bæta ráð sitt eða bæta fyrir það sem misgjört hefur verið ef þess er kostur. Ef brot telst vera af gáleysi má beita vægari viðurlögum, svo sem að veita viðkomandi formlega áminningu, víkja honum tímabundið af útkallskrá eða vísa tímabundið úr starfi.

Þegar stjórn félagsins hyggst láta félagsmann sæta viðurlögum af einhverju tagi, svo sem að honum sé veitt áminning, hann tekinn af útkallsskrá um lengri eða skemmri tíma eða vísað úr félaginu skal viðkomandi gefið færi á að skýra mál sitt og andmæla ákvörðun stjórnar.

Félagsmanni sem stjórn hefur gert að sæta viðurlögum af einhverju tagi skal gefast kostur á að skjóta máli sínu til úrskurðar félagsfunda.

8. grein.

Stjórn félagsins er heimilt að innheimta félagsgjöld af félagsmönnum. Eindagi félagsgjalds er 15. febrúar á hvert og er stjórn heimilt að láta skilgreint vinnuframlag í þágu félagsins koma í stað greiðslu. Framkvæmd gjaldtöku skal að öðru leyti ákveðin af aðalfundi.

9. grein.

Aðalfundur hefur æðsta vald í málefnum félagsins, en milli aðalfunda sérstök kjörin stjórn skv. 10. grein, sé ekki annars getið í lögum þessum.

Kjörgengi og atkvæðisrétt á aðalfundi hafa þeir félagsmenn sem orðnir eru fullra 18 ára og sem staðið hafa skil á félagsgjaldi fyrir yfirstandandi reikningsár sem og fyrir næstliðið reikningsár. Aðrir félagar hafa rétt til setu og framsögu á fundinum. Afl atkvæða ræður úrslitum mála, nema annars sé getið í lögum þessum. Félagsmenn geta ekki tekið þátt í aðalfundi á rafrænan hátt nema þess hafi verið getið í fundarboði og þar tilgreint hvernig afgreiðslu mála verði háttað.

Aðalfund skal halda í marsmánuði ár hvert og skal til hans boðað skriflega með minnst sjö daga fyrirvara. Aðalfundur er lögmætur ef 20 atkvæðisbærir félagsmenn hið fæsta sækja fundinn. Ef aðalfundur telst ekki lögmætur, skal samstundis boða til nýs fundar innan fjögurra vikna, og telst hann þá lögmætur ef réttilega er til hans boðað skv. framan skráðu.

Dagskrá aðalfundar skal vera þessi.
1. Formaður setur fund og tilnefnir fundarstjóra og fundarritara.
2. Staðfesting á kjörgengi og atkvæðisrétti fundarmanna.
3. Skýrsla stjórnar.
4. Endurskoðaðir reikningar og lagðir fram til samþykktar.
5. Ákvörðun félagsgjalds.
6. Fjárhagsáætlun til eins árs og fjárfestingaráætlun til 3 ára
7. Lagabreytingar ef þeirra er getið í fundarboði.
8. Tillögur sem borist hafa kynntar og bornar undir atkvæði.
9. Stjórnarkjör, skv. ákvæðum í 10. gr..
10. Kosning tveggja skoðunarmanna. Umboð beggja er til eins árs.
11. Kosning tveggja manna í uppstillingarnefnd. Umboð beggja er til eins árs.
12. Önnur mál.

Í aðalfundarboði skal greina frá þeim málum sem leggja á fyrir fundinn og tillögur til lagabreytinga ef þær hafa komið fram. Í aðalfundarboði skal einnig greina frá því hvar nálgast megi félagaskrá þar sem fram kemur hvaða félagar muni hafa þar atkvæðisrétt, gildandi lög félagsins, reglugerðir og samþykktir, sem og fundargerð síðasta aðalfundar. Á aðalfundi skulu svo liggja frammi þær tillögur sem leggja á fyrir fundinn og endurskoðaðir reikningar.

Ef ekki tekst að ljúka afgreiðslu mála á aðalfundi félagsins, skal boða til framhaldsaðalfundar. Dagskrá fundarins verði eingöngu um þau mál.

10. grein.

Stjórn félagsins skal skipuð sjö aðalfulltrúum, formanni, varaformanni, ritara, gjaldkera og þremur meðstjórnendum. Formaður og gjaldkeri skulu kjörnir sérstaklega en að öðru leyti skiptir stjórn með sér verkum. Formaður er kjörinn til eins árs en aðrir stjórnarmenn til tveggja ára. Haga skal stjórnarkjöri þannig að ekki gangi fleiri en þrír stjórnarmenn, auk formanns, úr stjórn milli ára.

Stjórn félags skal móta stefnu og skipuleggja starf félagsins. Stjórnin skal funda reglulega til að hafa eftirlit með rekstri félagsins og taka ákvarðanir um starf þess. Stjórnarmönnum er heimilt að taka þátt í fundum á rafrænan hátt og einnig er heimilt að afgreiða mál utan formlegra funda. Fjögur samhljóða atkvæði hið minnsta þarf svo mál verði samþykkt af stjórn. Halda skal gerðabók þar sem niðurstöður og ákvarðanir stjórnarinnar eru skráðar.

11. grein.

Í félaginu skal vera starfandi uppstillingarnefnd sem hefur það hlutverk að tryggja að framboð berist til allra embætta sem kosið er í á aðalfundi. Nefndina skipa þrír aðilar tveir kjörnir af aðalfundi og einn skipaður af stjórn og er hann jafnframt formaður hennar.

12. grein.

Stjórn félagsins er heimilt að skipa nefndir til að vinna að ákveðnum verkefnum. Stjórnin setur slíkum nefndum starfsreglur eða erindisbréf. Stjórn er einnig heimilt að setja reglur um einstök atriði í starfsemi félagsins.

Stjórn ber að kynna áform um nýjar reglur og breytingar á gildandi reglum á félagsfundi.

13. grein.

Stjórn félagsins skal boða til félagsfunda eigi sjaldnar en fjórum sinnum á ári. Stjórn er einnig skylt að boða tafarlaust til félagsfundar ef 15 eða fleiri atkvæðisbærir félagsmenn óska þess. Slíka kröfu skal senda stjórn skriflega og greina frá fundarefni. Til félagsfunda skal boða á tryggilegan hátt með minnst einnar viku fyrirvara.

Atkvæðisrétt á félagsfundi hafa þeir félagsmenn sem áttu atkvæðisrétt á næstliðnum aðalfundi og atkvæði verða ekki greidd um mál á félagsfundi nema hann sæki 20 atkvæðisbærir félagsmenn hið minnsta. Meirihluti atkvæða ræður úrslitum á félagsfundi.

Á félagsfundi verður ekki gerð samþykkt eða ályktun um nein önnur mál en þau sem getið hefur verið sérstaklega í fundarboði. Félagsfundur getur ennfremur ekki afgreitt nein þau mál sem fjallað er um á aðalfundi. Ef ætlunin er að bera eitthvert mál undir félagsfund þarf að tilgreina það í fundarboði og færa ákvörðun fundarins til bókar.

14. grein.

Stjórn félagsins kemur fram útávið fyrir hönd félagsins og ritar firma þess. Stjórn getur veitt öðrum heimild til að rita firma félagsins svo framarlega sem öðruvísi er ekki ákveðið í lögum þessum.

Stjórn félagsins sér til þess að bókhald sé fært og ársreikningur saminn í samræmi við lög sem un slíkt gilda.

Reikningsár félagsins er almanaksárið.

15. grein.

Stjórn skal á hverjum aðalfundi leggja fram fjárhagsáætlun þar sem greint er frá þeim tekjum sem áætlað er að félagið hafi og hvernig þeim verði ráðstafað. Ef stjórn sýnist að veruleg frávik verði frá samþykktri fjárhagsáætlun skal boða til félagsfundar og greina frá þeim ráðstöfunum sem stjórn hyggst grípa til svo starfsemi félagsins sé í samræmi við áætlanir.

Stjórn skal einnig á hverjum aðalfundi leggja fram fjárfestingaráætlun til 3 ára þar sem greint er frá öllum áformum um kaup og sölu á tækjum eða búnaði.

Stjórn er óheimilt að ráðstafa fjármunum og eignum félagsins umfram það sem tilgreint er í fjárhagsáætlun og fjárfestingaráætlun. Stjórn er einnig óheimilt að selja eða kaupa fasteignir nema með samþykki aðalfundar.

Í öllum ráðstöfunum fjármuna félagsins skal stjórn leitast við að ávaxta sjóði þess á þann hagkvæmasta og tryggasta hátt sem býðst hverju sinni, hjá banka eða sparisjóði. Meginstefna skal vera öryggi freka en há ávöxtun.

16. grein.

Ef starfsemi félagsins verður lögð niður, skulu eignir þess vera í vörslu Akureyrarbæjar fyrstu átján mánuðina. Ef ekki hefur verið reynt að endurvekja félagið að þeim tíma liðnum skulu síðast kjörnir skoðunarmenn og einn fulltrúi tilnefndur af bæjarstjórninni á Akureyri ráðstafa eignum sveitarinnar til björgunarmála og slysavarna.

17. grein.

Lög þessi eru samþykkt á aðalfundi 9. apríl 2026 og öðlast þá þegar gildi og með þeim eru úr gildi fallin eldri lög félagsins. Minnst þrjá fjórðu hluta greiddra atkvæða þarf til breytinga á lögum félagsins, slita þess eða afhendingar meiri hluta eigna þess.

Tillögur um breytingar á lögum félagsins þurfa að berast stjórn skriflega eigi síðar en 1. febrúar og verða þær þá teknar til meðferðar á næsta aðalfundi

Ákvæði til bráðabyrgða.

Ef aðalfundur 2026 samþykkir tillögu um að innheimt skuli félagsgjald skal félagsmönnum gefinn kostur á að standa skil á félagsgjaldinu að lágmarki til 1. júní 2026 og teljast þá hafa atkvæðisrétt á aðalfundi 2027 ef viðkomandi standa einnig skil á félagsgjaldi fyrir almanaksárið 2027.

Breytingar:

Breyting aðalfundur 12. mars 2001  8.grein

Breyting aðalfundur 8. mars 2007  8.grein

Breyting aðalfundur 12. mars 2009 8. 9. 10. 11. grein

Breyting aðalfundur 14. mars 2017  9.grein

Breyting Aðalfundar 18 mars 2021  10.grein

Breyting aðalfundur 10. mars 2022  7.grein

Breyting aðalfundur 11. mars 2024 9. grein

Breyting aðalfundur 9. apríl 2026 2. 4. 5. 8. 9. 10. 12. 13. 14. 15. 17. grein